Kya karoge?

Kya karoge agar kal subah tumhari aankh khule, lekin mere message ka notification na aaye?

Kya karoge agar ek bhi reel na bheji hoon maine, aur tumhare inbox me sirf purani baatein bachi ho?

Kya karoge agar tum college aao, aur wo ek jaga jaha hum hamesha milte the, waha mujhe na pao?

Kya karoge agar tum mujhe dhoondhne niklo, lekin har gali, har kona sirf ek khaali mehsoos ho?

Kya karoge agar mera last online status tumhe mahino purana dikhe, jaise sab kuch wahin ruk gaya ho?

Kya karoge jab me sach me gayab ho chuki hoon, bina kisi alamat ke, bina kisi alvida ke?

Kya karoge jab mere ghar phone karo, aur har baar sirf bejaan ghanti bajti rahe?

Kya karoge jab mere doston se pucho, aur koi bhi meri koi khabar na de sake?

Kya karoge jab tumhe yeh samajh aaye, ki shayad me kabhi thi hi nahi?

Kya karoge agar tum din bhar intezaar karo, lekin meri taraf se ek bhi baat na ho?

Jab tumhare phone me meri chats ho, par unka koi jawab na ho?

Jab tumhare gallery me meri tasveerein ho, par me unme sirf ek yaad banke reh jaun?

Kya karoge jab tumhe pata chale ki me thi, par ab nahi hoon?

Kya tab bhi mujhe yaad karoge?

Kya tab bhi mujhe dhoondhoge?

Ya phir bas duniya ki bheed me mujhe bhi bhool jaoge?

Kya karoge agar ek din sach me sab kuch khatam ho jaye, 

par tumhare dil me ek bhi alvida kehne ka mauka chut jaye?